Viaç te tiere dal Dalai Lama che di agns al cîr di sensibilizâ il mont par liberâsi de smuarse cinese.
La storie dal Tibet come nazion e scomence cu la nassite di re Tho-tho-ri-Nyantsen tal 173 a.C. In chei agns, la religjon praticade e jere di stamp siamanic e si clamave Bön. Ma il vêr fondadôr dal Tibet al è considerât re Songsten Gampo XXXIII, de dinastie di Yarlung. Nassût tal 608 d.C., chest re al fo chel che al decidè di fâ de citât di Lhasa la capitâl e al fasè dal budisim la religjon di stât. Cuntune alternance di reams, podês e sieltis religjosis, si rive fint al 1391 d.C., an di nassite di Gedun Drup, il prin Dalai Lama e prime reincjarnazion di Chenresing, il Bodhissatva (corispondent in linie di massime al sant nostran o dut câs a une vuide spirituâl) de compasion.
I Dalai Lama che a son vignûts dopo di Gedun Drup, considerâts a lôr volte la reincjarnazion dal prin Dalai Lama, a forin a cjâf dal guvier tibetan de fin dal 1500 al 1950, an de ocupazion cinese dal Tibet. Intant, il Tibet al jere stât za invadût dai mongui, dai missionaris portoghês, dai inglês, e ancjemò prime di svariâts tentatîfs de Cine di aneti il Tibet tal so teritori, obietîf otignût cu la invasion militâr dal 1951.
In principi, secont un pat fat tra il guvier cinês e il Dalai Lama, il Tibet al varès vût di jessi une regjon autonome. Il Dalai Lama, che in chê volte al veve dome 16 agns, al à simpri cirût un compromès cu la Cine; ancje cumò la sô posizion no è favorevule a la indipendence dal Tibet, ma a smire plui a fâi vê al Tibet une plui grande autonomie dentri la jurisdizion cinese. La Cine però no si à mai preocupade di rispietâ il pat dal 1951 e midiant di imposizions e violencis, e à puartât la popolazion a une rivolte, il Dalai Lama al esili in Indie e a une ridistribuzion des tieris, soredut dai munastîrs, secont i principis dal regjim comunist di Mao. Tal 1964 il Tibet al devente “Provincie autonome” sot de Cine e i tibetans a scomencin a lassâ il paîs in masse. Si calcole che fint cumò a sevin 6.000.000 i rifugjâts che a àn lassât il Tibet mentri i muarts par cause de repression a saressin almancul 1.000.000. Tra i altris dams, si calcole che il 90% dal patrimoni artistic e architetonic tibetan, che al includeve cirche 6.000 monuments, al e lât distrut tai ultins 50 agns.
La jentrade di imigrants cinês in Tibet (7.500.000 personis) in concomitance cul esodi de popolazion locâl, e je daûr a puartâ a une situazion là che i Tibetans a son une minorance a cjase lôr. Par dîle cu lis peraulis di Jampal Chosang, responsabil de Coalizion tibetane, la Cine e à introdot in Tibet une vere e proprie forme di apartheid, soredut parcè che la culture, la religjon e la identitât nazionâl dal Tibet a costituissin une menace pe Cine. A dispiet di chest, la culture tibetane e je cognussude e rispietade in dut in mont, ancje grazie ai simpri plui numerôs turiscj che fint dai agns 1980 a visitin il paîs e a puartin a cjase informazions sul Tibet e la sî dificil situazion.
Il XIV Dalai Lama, Tenzin Gyatso, che al vuide ancjemò il guvier tibetan de Indie, al zire il mont par sensibilizâ la int sul patiment dal so popul. Grazie al so impegn, tal 1989 al è stât premiât cul Nobel pe pâs. La cause dal Tibet e je atualmentri supuartade di simpri plui int in dut il mont ocidentâl: concierts “Tibetan Freedom” a vegnin organizâts in Americhe, manifestazions a puartin miârs di personis in place in Europe (tra lis manifestazions plui impuartantis Bruxelles tal 1996, Gjinevre tal 1997 e Parîs tal 1998) e ancje lis stars di Hollywood, come Richard Gere, a cirin di fâ alc par judà chest popul in dificoltât.
