Di cuant che a son stadis lis elezions a Jugn di chest an, la Belgjiche si cjate intune dificile impasse politiche: il partît Cristian Democratic flamant al à vude la maiorance, ma nol è rivât a formâ une gnove coalizion di guvier.

Lis cuistions che a dividin la Valonie francofone e lis Fiandris a àn lassât il paîs cence un guvier par mês. Chest al à impiât une discussion che e podarès puartâ ae prime separazion dentri di un stât european dai timps de Seconde Vuere Mondiâl. La Belgjiche e fo creade come “stât-cussin” tal 1830 e di in chê volte la sô identitât come stât unitari e je simpri stade balarine. Cumò, dome un tierç de popolazion e pense che il paîs al esistarà ancjemò ca di 10 agns. L’ultin scandai dal gjornâl flamant Het Laatste Nieuws al palese che il 46,1% dai flamants a vuelin la division dal paîs, ma la maiorance (il 49,6%) e preferìs ancjemò la union.
Il prin tentatîf di bande di Yves Leterme dal partît Cristian Democratic flamant di formâ une coalizion di guvier cui Liberâi si è scuintrât cu la resistence dai partîts francofons, spaurîts de idee di pierdi autonomie decisionâl soredut in tiermins di tassis e sigurece sociâl. Cun di plui i flamants a vuelin plui autonomie pes regjons, e eliminâ cuasi ducj i podês centrâi, fale che la difese. La Belgjiche e deventarès cussì un stât confederât, invezit che federâl. In plui, a progjetin di dividi il distret eletorâl di Brussels-Halle-Vilvoorde, une aree che e cjape dentri comuns là che la int e fevele sedi francês sedi olandês e che i francofons a viodin come un altri pas bande la indipendence des Fiandris. Chest distret, cussì come lis zonis francofonis ator di Bruxelles, a son di pês parcè che a son tra lis plui sioris dal paîs.
Chei che a sostignin la creazion di une confederazion a pensin che:
a) e continuarès a jessi la stesse division territoriâl (Fiandris, Valonie e Bruxelles come zone bilengâl)
b) e conservarès il non “Belgjiche”, che al zove ae imagjin internazionâl
c) e evitarès altris discussions sul rûl de monarchie, la anession de Valonie ae France, i berdeis tirâts fûr di bande di chei che no vuelin une division secje dal paîs.

Resintis discussions a dimostrin che une confederazion e samee cuasi inevitabile. Cualchidun al viôt la creazion di une confederazion belghe come un prin pas viers une Europe confederade, soredut cumò che ducj a doprin l’Euro come monede e che no esistin plui confins, in gracie dal pat di Schengen.
Intant, il mês passât la vendite des bandieris de Belgjiche e je triplicade, soredut a Bruxelles, la capitâl e l’imni nazionâl, la Brabanconne, e je stade la musiche plui scjariade di Internet come sunerie dal telefonin di bande dai francofons. Al contrari, tes Fiandris la int e je plui a pro de autonomie e de indipendence. Il fat al è che tes Fiandris e vîf la plui part dai Belghis, 6 milions, cuintri i 3,4 milions de Valonie, che e je ancje la zone plui puare dal paîs, e chest al contribuìs a la situazion curinte.
Cheste no je la prime impasse politiche dal gjenar: tal 1988 il paîs al è stât 148 dîs cence guvier nazionâl. Cheste volte ce che al preocupe no je la durade des discussions (che a van indenant di Jugn), ma il fat che al samee che no si rivedi a nissune conclusion.