La Scozie, une des cuatri nazions che a costituissin la Grande Bretagne, e conte pôc plui di cinc milions di abitants e trê lenghis uficiâls: l’inglês, il gaelic e il scozês. Il scozês al ven tabaiât in dì di vuê di un milion e mieç di personis in Scozie e 30.000 in Irlande dal Nord. La lenghe scrite e uficiâl no à ancjemò une grande difusion: codificade dome te metât dal secul passât, e je ancjemò une lenghe prevalentementri orâl, ricognussude de Cjarte europeane des lenghis regjonâls o minoritariis, ma doprade di râr tai media locâi. E pûr, e je doprade tal Parlament e e puess contâ su figuris impuartantis come il poete Robert Burns (1759 – 1796), che al à scrit lis sôs oparis mestris in cheste lenghe.
Pe difese e promozion dal scozês, a son stadis recentementri creadis associazions come la Scots Language Society e il Scots Language Center.
UNÎTS DI TRESINTE AGNS_La Scozie e je part de Grande Bretagne fin dal 1707 cuant che cuntun document clamât Act of Union (at di union) il guvier scozês e chel inglês si son fondûts intune uniche entitât, cun sede a Londre. Il cjâf di stât, duncje; e je la regjine Elisabete II, ma in gracie di un sisteme di devolution (che al consist intall conferiment di podês a un guvier locâl) promovût di un referendum che si è davuelt tal 1997 e che al è passât cul 75% dai vôts, dal 1999 la Scozie e à une aministrazion locâl ancje se il so parlament nol è dal dut sovran. Il parlament scozês al à la autoritât legjislative par chel che al inten la Scozie; par esempli cheste nazion e je stade la prime a improibî il fum tai locâi e, a diference dal rest dal Ream Unît, servizis come la universitât e la assistence pai anzians so gratuits.
Di fat, la Scozie e à carateristichis ben diviersis dal rest dai paîs che a componin il Ream Unît. Lenghe, culture e sistemis legâi, educatîfs e bancjaris a fasin di cheste zone un stât par so cont.
I PARTÎTS E LIS IDEIS_I moviments pe indipendence a àn une schirie di obietîfs: difese, tassis, politiche foreste (par esempli, rivâ a fâ part des Nazions Unidis), imigrazion, sicurece sociâl e pensions. Chest cu la libertât di sielzi il so guvier tal contest di un stât indipendent. La plui part dai partîts politics che a puartin indevant la indipendence a son di çampe, ancje se il partît plui impuartant in chest sens, clamât Scottish National Party (SNP) al conte ancje rapresentants di centridrete. Cumò i partîts che a puartin indevant la idee di une indipendence complete di Londre a son daûr a cirî di vê un ategjiament costrutîf e si son metûts adun sot dal cjapiel di un moviment clamât Scottish Independence Convention. Chest grup al vûl rispuindi a trê domandis fondamentâls: cuâi che a saressin i aspiets positifs de indipendence, cemût che e varès di jessi fate la transizion e cuâi che a son i principis de nazion scozêse tal rapuart cu la Grande Bretagne e il rest de Europe.
I partîts che a son a pro de indipendence a son, insieme cul SNP, i Verts, il Partît Socialist, il Partît Conservatôr e il Solidarity Group di Tommy Sheridan.
ELEZIONS_Ai trê di Mai che al ven, a saran lis tiercis elezions tal parlament scozês dopo de sô creazion tal 1999. Jack McConnell, il prin ministri, si presentarà a cjâf di une coalizion di laburiscj e liberâi democratics. Cheste coalizion e je stade al podê fin dal 1999. L’SNP, in dì di vuê secont partît in tiermis di membris tal Parlament scozês, al è dât come favorît dai ultins scandai preeletorâi, probabilmentri in coalizion cul partît dai Verts.