La Belgjiche e je cognussude come un stât di larc respîr internazionâl: no a câs la sede de plui part des istituzions europeanis e je a Bruxelles, la capitâl.
Chest nol stupìs. Di fat daûr de sô Costituzion, la Belgjiche e je un stât federâl dulà che la division aministrative (cu lis trê regions: valone, flamante e di Bruxelles) e je compagnade di une division linguistiche là che si ricognossin trê regjons principâls: francese, flamante, gjermanofone plui la regjon bilengâl di Bruxelles.
La prime e costituìs il 41% de popolazion e e je a sô volte dividude tra i valons e i francofons di Bruxelles. La seconde, 58% de popolazion, e je concentrade tal nord dal paîs mentri la tierce e costituìs mancul dal 1% de popolazion, uns 70.000 personis che a vivin in 9 comuns sul confin cu la Gjermanie.

Un mosaic linguistic_Lis lenghis tabaiadis in Belgjiche a costituissin come un mosaic: piçui tocs metûts insieme. Si scuvierç alore che la zone di Bruxelles e je bilengâl (francês e flamant), tes Fiandris si tabaie flamant, ma a son agjevolazons pai francofons e invezit te Valonie si tabaie francês, ma cun agjevolazions sedi par chei che a tabain flamant che pe minorance todescje.
Interessant al è il fenomen dai «comuns autonoms a statût speciâl», traduzion dal Flamant «faciliteitengemeenten» e dal francês «communes à facilités», là che leçs speciâls a tutelin i dirits des minorancis linguistichis e lis minorancis a podin doprâ la lôr lenghe cu la aministrazion locâl e federâl. E no dome chest. Il stât al finanzie in maniere avuâl lis scuelis destinadis al insegnament inte marilenghe de minorance e lis feradis nazionâla a furnissin informazion intes lenghis minoritariis.
Di fat i comuns a àn autonomie in tiermins di insegnament, culture, sanitât, jutori a lis personis e, a part la comunitât di Bruxelles, di sielte linguistiche.
No stin a dismenteâ ancje che lis istituzions federâls a gjoldin di grande autonomie cuntun lôr parlament e guvier.
No cate chest, sedi i Flamants sedi i Francês a lamentin pôc rispiet di bande des autoritâts viers i lôr dirits linguistics. Lis autoritâts dal paîs e de Union Europeane a vegnin spes clamadis par arbitrâ e discussions a vegni fatis sedi tal Parlament Federâl Belghe sedi intes assembleis regionâls e comunâls.

Simpri plui voie di autonomie_La atuâl evoluzion istituzionâl e politiche e mostre une cressite des competencis dadis aes regjons. Di fat la Belgjiche al è l'unic stât là che al è stât metût in vore un federalisim incentrât sutune autonomie fondade su la culture comune che nol derive di un percors globâl, ma des riformis disordenadis che a tentavin di volte in volte di vignî incuintri aes aspirazions des diviersis comunitâts. Chest al à puartât cualchi volte a une mancjance di coerence che no simpri e sodisfe lis esigjencis di tutele des diviersis minorancis. Par esempi, la Valonie e rivendiche plui autonomie culturâl, mentri che la regjon flamante e aspire a plui autonomie fiscâl, seneose di gjoldi di plui des ricjecis che e prodûs.