Il Quebec e je une Provincie dal Canadà: part de Gnove France tal an 1760, e je deventade une provincie de Federazion Canadese tal 1867. La sô popolazion e je di uns 7.600.000 personis. Lenghe uficiâl dal Quebec al è il francês mintri la int che e tabaie l’inglês e rapresente une minorance, dome il 7,9% de popolazion totâl. Al è di dî però che buine part de popolazion e je bilengâl o multilengâl. I francofons dal Quebec a rapresentin il 19.5% de popolazion canadese e il 90% dai Canadês che a tabain par francês. In sumis, une minorance cuntun ciert pes politic e economic. La diversitât di cheste
regjon e fâs sì che si sedi svilupât un moviment di sostegn ae sovranitât nazionâl clamât “Quebec Sovereignity
Movement” che al ricognòs il Quebec come une nazion cu la sô int e cuntun control democratic sul stât. Il stât al è rapresentât di un so guvier, che però dentri de Federazion
Canadese nol à un podê costituzionâl suficient par rindi la gjestion statâl efetive.
In pratiche, chest moviment nol riten sodisfacent il sisteme federalist canadês, e al propon une sovranitât nazionâl sô, partint dal principi che la popolazion di cheste provincie e je ben diferente di che dal rest dal paîs. La cuestion no je dome politiche, ma ancje culturâl: la discussion di fat e je incentrade sul fat che, daûr di chest moviment, dome une sovranitât proprie e pues difindi la lenghe francese intune zone, come che de Americhe dal Nord, anglofone.
Dome cussì, al sosten il moviment, la popolazion dal Quebec e podarà mantignî vive la sô identitât culturâl e la sô memorie coletive. Di fat, par motîfs soredut di lavôr leâts al “business” cul rest dai paîs americans, il numar dai anglofons al è daûr a cressi ancje in Quebec e la popolazion locâl e sint che la sô identitât di popul e je in cualchi maniere in pericul. Di bande lôr, i anglofons dal Quebec a àn istituît tal 1998 un comitât1 pe integrazion de int che e tabaie par inglês te societât de Provincie. Chest comitât al cîr di no jessi un orghin politic, ma un strument par judâ i individuis intune cressite personâl intun percors di integrazion
cu la maiorance francofone.
Il Guvier Canades al à tentât di risolvi la cuestion
dal Quebec e di gjestî il Paîs in forme federative. Tal 1980 si è tignût un referendum par decidi de sovranitât dal Quebec, che in chê volte si è risolt cuntun sostegn al
federalisim cul 60% dai vôts.
Tal 1991 si à tornât a tabaiâ di istituî un secont referendum: di fat daûr di un scandai al sameave che in chel moment la situazion si fos ribaltade e che la popolazion favorevule a une nazion sovrane e fos il 65%. Tal 1995 si à duncje vût il secont referendum, là che si
domandave ae popolazion di votâ “sì” se e jere dacuardi a scomençâ un procès di creazion di une sovranitât nazionâl. Ancje cheste volte, une vitorie dal “no”, cul 50,9% des preferencis suntun totâl di votants dal 93.5%. Chest vôt al à dimostrât in chê volte che la cuestion e jere ancjemò vierte e par nuie risolte. Cussì tal Novembar dal 2006 si
è rivâts al ricognossiment definitîf dal Quebec come nazion “dentri dal Canadà” di bande de House of Commons. Dome 16 parlamentârs cuintri 266 a son stâts contraris a cheste mozion di ricognossiment dal Quebec come nazion, un ricognossiment soredut in sens socio-culturâl pluitost che
politic. Il Prin Ministri Harper di fat al à declarât che si trate di un gjest simbolic che nol puartarà a nissun cambiament te costituzion o te leç. Chest al à di sigûr favorît il sostegn di grande part dai parlamentârs e il
ricognossiment di bande dal guvier centrâl al à anticipât lis mossis dai politics dal Quebec.
La pôre cumò e je che la discussion costrutive su la nature nazionâl dal Quebec no vegni aprofondide ulteriormentri, ma che e vegni abandonade.