Tai Balcans un popul si autodetermine e la politiche internazionâl e va in fibrilazion.

Nol capite ogni dì che une regjon europeane (se no altri, almancul dal pont di viste gjeografic) si declaredi indipendente. Al è capitât tal Fevrâr di chest an tal Kosovo (o Kosova, come che al sarès te lenghe albanese locâl, n.d.r.), puest che spes al è stât nomenât, soredut tai agns Novante, par colpe di une vuere lungje e dolorose. Ma scomencìn dal principi.
Il Kosovo, une aree di cuasi 11.000 km cuadrâts e cuntune popolazion di 2,2 milions di personis, al fâs part de Serbie dal 1912, an de vuere dai Balcans cuintri l’Imperi Otoman. Za ta chei agns, i Albanês a scugnin lassâ in masse la lôr tiere, lâ a parâsi tes monts, par vie dal plan de Serbie di colonizâ il Kosovo. Pôcs agns dopo, e tache la Prime Vuere Mondiâl. Il Kosovo al ven ocupât dai Imperis Centrâi, austro ungaric, todesc, otoman e Bulgarie. A la popolazion albanese no i pâr vere, si sintin liberâts dal domini e de opression e a tornin a tirâ flât. Purtrop par lôr, chest al dure pôc: tal 1918 il Kosovo al jentre a fâ part dal ream di Serps, Cravuats e Slovens e al ven dividût in cuatri tocs, trê tes mans de Serbie, un tes mans dal Montenegro, creant malcontent te popolazion albanese, costrete a apelâsi a la Leghe des Nazions (la “none” des Nazions Unidis di cumò), par denunciâ 12.000 Albanês muarts e 22.000 metûts in preson dai Serbs e a creâ un moviment di resistence, clamât Kachak. Dal 1929 al 1941, il ream al devente Jugoslavie e une buine fete di Kosovo a va a finîle tes mans de Italie fassiste. Un brut moment pai Serps: dentri dal Avost dal 1941, plui di 10.000 a forin copâts e tra i 80.000 e i 100.000 parâts vie dal Kosovo. Tal 1943 a rivin i comuniscj dal Comintern albanês, e il Kosovo al torne a la Jugoslavie, aromai deventade une republiche popolâr federâl, formade di 6 republichis e governade di Tito. Dôs voltis il Kosovo al domandarà di jessi ricognussût come republiche: tal 1868 e tal 1981, subit dopo de muart di Tito. Dutis dôs lis voltis dibant.
Intant che la popolazion albanese e cresseve, passant dal 75% al 90% de popolazion totâl dal Kosovo, che serbe e calave. Stant che si jere intai Balcans, no podevin no rivâ altris tribolazions, cheste volte cuntun non ben precîs: Slobodan Miloševi?. Tal 1989, Miloševi? al revoche dutis lis autonomiis costituzionâls dal Kosovo, includût il status di lenghe paritarie dal albanês, fin a chel moment considerade lenghe uficiâl adun cul serp cravuat.
Di chel moment, tancj kosovârs a àn sielt la lote no violente: sot de direzion di Ibrahim Rugova, la minorance albanese e declarave za tal 1990 la indipendence dal Kosovo, ricognussude in chê volte dome de Albanie, sielte confermade ancje di bande di un referendum fat tal 1992, li che al à votât l’80% de popolazion, e di chest il 98% a pro de indipendence. Une part de popolazion e à invezit sielt la violence e lis armis, lotant cul Ushtria Çlirimtare e Kosovës (UCK). Dal 1999 il Kosovo, cun guvier e parlament provisoris, al finìs sot dal protetorât NATO e des Nazions Unidis (UNMIK), simpri come provincie serbe, fint ai 17 di Fevrâr dal 2008, date de proclamazion di une indipendence cheste volte ricognussude e sustignude di diviersis bandis, tra chestis la Americhe e diviers paîs europeans come la Italie, la Francie, la Grande Bretagne e la Gjermanie. Contraris: Spagne, Grecie, Cipro e Romanie, (che a àn pôre che chest ricognossiment al deventendi un precedent par regjons come i Paîs Bascs e la zone a nord de isule di Cipro) insiemit a la Russie e a la Cine.
Un moment delicât chest, pal Kosovo a la sô int. Fieste par cualchidun, amarece e pôre par cualchidunaltri, come che al è simpri stât te storie di cheste piçule regjon.